### سمين و نحيف ### [ فنجال قهوة على الماشي

تقوم شركة لوفتهانزا وبعض شركات الطيران بدراسة رفع قيمة تذاكر السفر على( الدبــبـــه )
، و ستجبر الشركات البدناء بشراء تذكرة ثانية بقيمة 75% من قيمة التذكرة الأصلية، لأنهم غالبا
يحتلون كرسيين وفي أفضل الحالات كرسي ويضايق اللي جنبه ــ حسب وجهة نظر شركات
الطيران ـ ويغث اللي جنبه اذا تركّى ما يعطيك فرصة ويخليك تضم يديك كنك بتدخل بين سيارتين ،
وكنهم يقولون ( للسمان ) يا تنحف يا حوّل عن طيارتنا او عطنا قروشن اكثر.

في الوقت الذي نتوقع فيه ان شركات الطيران تعطي تخفيضاَ للبدناء نجدهم يفكرون برفع السعر
عليهم والتسبب بالجلطات لهم ومغثتهم زودنه على اللي فيهم.


البدين لم يختار شكله ومتأكد ان كل بدين يتمنى تخفيض وزنه نتيجة الإحراج الذي يواجهه في كل
مكان والذي يتراوح بين نظرات المتطفلين و هواة النصائح بتخفيض أوزانهم، او هواه ابداء
الملاحظات ( ياخي وزنك زايد ) !!! يدري والله .. كل يوم يشوف نفسه بالمراية ..

كنت قادما من لندن وعند استراحة بوابة الطائرة كنت اتفحّص وجوه المسافرين كعادتنا العربية
الأصيلة ، وقعت عيني على شخص بدين جدا وقلت عسى ما يصير جنبي ـ ليس من باب العنصرية ـ
ولكن لصعوبة خروجي من مقعدي اذا اضطررت لذلك خوفاً من مضايقته بكثرة الخروج والدخول ،
لاني ما اقر على الكرسي و ما انام في الرحلات اطلاقا .. لخوفي من سقوط الطائرة
وما اكون مستعد للطيحة أو ما ادري اذا ( جاوبت ) هو حلم وإلا علم.

ركبنا الطيارة وسبحان الله كأنها امنية تحققت ، جلس جنبي شاب سمين ولحسن حظه ان الكرسي في
الوسط كان شاغرا فجلست جنب الشباك وجلس في كرسي الممر ورفع اليد في الوسط واحتل
الكرسيين .. وقبل تقلع الطائرة جيت ابسولف معه .. نقطّع الطريق ..
ما دريت الا هو رايح في سابع نومة قلت ماشاء الله هذا وحنا ما اقلعنا!!!

احتجت الخروج من مكاني بعد اطفاءت اشارة الحزام ، فاضطريت اقومه من نومه و مكانه ..
ورحت شوي ثم رجعت الا القاه نايم ويشخر .. قومته مره ثانية من نومه واعتذرت منه على
الازعاج وقلت له وش رايك نغير الاماكن علشان ما ازعجك قال لا ..
مافيه مشكلة ما يحتاج نغير وما امداني اتواسى بكرسيي الا الرجال ( طارخن راسه )
ونام مره اخرى . جلست ساعة وقررت اتمشى فاضطريت اقومه ثالثة.. وعندما رجعت لقيته نايم
وعلى هالحال يمكن خمس مرات ..
وفي كل مره لا يواجه مشكلة بالعودة للنوم مجرد يضغط زر وينام.

استحيت واحتجت اني اخرج من كرسيي للمرة السادسة.. حسيت اني مصختها، فقررت اطمره وفعلا
نجحت وحسيت ان عندي مهارات قفز الكثبان الرملية لاني اكتسبت هالخبرة من الطعوس اللي بالثمامة
، يوم رجعت كنت فاصخ الجزمة وشرابي مشقوق من عند الاصبع الكبير وريحة الشراب كنها ريحة
فنايل ساحل العاج بنهائي افريقيا.. قررت اطمره مرة اخرى، وبحركة فنية بالبطيء صارت رجلي عند
خشمه يبدو ان رائحة جواربي كانت قويه فانتبه من النوم كأنه مغمى عليه مخلينه يشم بصل. طارت
عيونه ان فيه شرابه عند وجهه ، يوم شفته انتبه ..!!
استحيت واعتذرت مره عاشرة، بس بعد ايش بعد خراب مالطا وحركت اصبع رجلي الكبير في
محاولة لادخاله بالشراب والمحافظة على برستيجي،. وصلنا الرياض وهو نايم فصحيته!!
قال : ياخي الرحلة قصيره ما طولنا .. قلت له مازحاً .. طبيعي يا حبيبي انت طاقها نومة
من يوم طلعنا والظاهر انك تحسب طلعاتي ودخلاتي اضغاث احلام.



اشفقت على حالة وقلت الله يعينه وتمنيت من الله ان يساعده في حياته ..
ويهدي شركات الطيران اللي بترفع سعر التذاكر عليه ..
خاطرة :
في الاستراحة مع الشباب اول مره نلعب كرة طائرة ..
كنا نقسم الفريقين .. فيه واحد من الشباب ( دب ) ..
ولا احد اختاره .. لين جلس بلحاله بالاخير .. وصار ( غصب مع الفرقة الثانية )..
بدأ اللعب ..طلع يعرف يلعب وفنان بعد ..
وصار بعد كل كورة يسجلها على الخصم يقول ـ بتهكم ـ : هذا الدب اللي ما تبونه !! اوريكم !!
وفي كل مره يسجل نقطة يقولها .. صارت المباراة كلها ضحك ..
وسميناها ( موقعة .. هذا الدب اللي ما تبونه )..
انا اشوف ان اللي زايد وزنه ..
عنده اشياء ما توجد في الاخرين في كثير من الاحيان ..
طيبة قلبة .. وضحكة سنّه ..


السؤال اللي يطرح نفسه ..
هل ستقوم شركات الطيران بدراسة تخفيض التذاكر لي لاني للمعصقلين مثل ما ترفع على البدناء؟؟
كيف تقييمك لقرار شركات الطيران برفع السعر على البدناء ؟
كيف شركات الطيران بيعرفون البدناء قبل شراء التذكره ؟؟
هل بيروح الواحد يوزن بالمطار مثل الشنط؟ واذا صار دب .. ـ برايهم ـ ما يطلع لين يدفع فرق السعر ؟؟
انتظر مداخلاتكم .. على هالمحاور او اي شيء ترونه بالموضوع .. يستحق المداخلة او الذب .



,

يااااااااه الله يعين كل واحد سمين ييسللمووو عالموضوع وتقبل مروري

[b]يعطيك العافيه

الله يعافيكم وسامحوني على القصور