موضوع: هذي الدنيا حظوظ الثلاثاء مايو 04, 2010 6:43 am
قبل كل شيء تراني إلى قبل ساعه بس فهمت وش يتكلم عنه موضوعي عاد ان شاء الله انكم أشطر مني ولو ان الصراحه وبيني وبينكم احسها صعبه عليكم
في احد الايام الماطره والجو براد يالله من فضلك كان خالد جالس ( لاا منبطح اذا تكلمنا بذمه ) ع التلفزيون ويقلّب بهالقنوات لاتتوقعون ان خالد يبي برامج تحليل اقتصادي برضو السياسه ماهوب الشيء اللي كان خالد يبحث عنه ! بتقولون لي أكيد يدوّر قناة رياضيه ؟ اقولكم لاعاد تعيدونها ولاعاد تقاطعوني مرتن ثانيه ! وعناد خطأ عليكم كان خالد كالثور الهائج وهو يصب جام غضبه على أزرّة الريموت المظلومه واللتي تريد الوصول الى القناة المطلوبه اكثر من خالد نفسه ! دقائق من الصمت اللي مايخربّه الا اصوات طقطقة الريموت المستفزه الا وخيّم الصمت تخييمتن قشرا وكان الهدوء اللي يسبق اللجه . بدا خالد يهابد مع قناة غنوه ( الملجأ النفسي ) بعد ان انفرجت تعقيدة حواجبه وارتاحت سريرته وغطّ ضميره في قيلوله بعد العشاء !
رغم انّ : منظر خالد الـ مش ولابد لايوحي بأنه من حقين قناة غنوه وهز وبسط كان خالد أقرب إلى الدلخ شكلياً ! وحتى لامنّه تكلّم فعلاً تصدق توقعاتك الأوليه المستنده على المظهر حتى لو حاولت اشبّه العبط المتكوّم فيه بشخصية كرتونيه عبيطه برضو راح افشل فشل ذريع اذ انّه ولاشخصيه مرّت فيها الكمية اللامحدوده من الغباء وقلة الحيله
شكله زايد الطين بلّه وحايقها عليه يعني حتى لابغى يتلحلح ويغازل ووقف قدام المرايه يبحلق ويقنع عقلة الباطني ( انا وسيم انا حلو انا انيق ) شوي الا المرايه تافلته حكمته بالحياه خن اباري الساس ومالي ومال وجع الراس وانا ابو راس كل الطرق والمحاولات المستحيله للحصول على شقفة وظيفه انسدت بوجهه وهذا شيء اكيد وواضح ومانختلف عليه وبعدين منهو هالفهيم اللي يبي يعيّن موظف مهمته يستلم راتب وبس ؟
خالد مازال اعزب ومتلحط جنب خواته ولافكّرت امه تخطب له ولاهيب ناويه بعد لاهو اللي يبيّض الوجه عند اهل البنت ولاهوب اللي ينسلم من شرّ تهوره اللي فينا نربطه مع غباءه بعلاقة طرديه ونحذفهم بأقرب برميل زباله بس عشان نعطي خالد شوية اهميّه تراه كان هلالي على فكره
بإختصار مما سبق نستنتج ان حياة خالد ولاشيء .. ولاشيء .. !
المهم مرّت الايام وجاء القدر المحتوم عقب ماخلص ثمن عمري وسالت دمعة عمر وخالد مازال متسدّح على هالتلفزيون لاشغل ولامشغله + لاحسيب ولارقيب !
دق جوال خالد وحطّه صامت بعدين غيّر رأيه ورد : هاه أنور ( اخوه الكبير ) : السلمعليك شلونك ؟ خالد : اخلص أنور : وين الله بيوفقك وانت شين ونفسيّه بعد وياويلك لو تسكّر خالد : انجز أنور : حبيت اقولك اني بسافر مكه عندي دوره وابي تخاويني دامك عطّال منها نستانس سوا ومنها ناخذ عمره خالد : طوووووووووووووووووووط
دقيقه ودق جوال أنور : خير ؟ خالد : خير انت ؟ فصل جوالي لأن مابوه بطاريه ايه وش كنت تبي فيني ماسمعتك ؟ أنور : قلتلك ابي اسافر مكه وودي تخاويني نعتمر وننبسط انا واياك خالد : على فكره انور لاتحسبه طفت البطاريه طوووووووووووووووووووط
جدع خالد جواله على الكنبه بعد ماحط قناة بدايه لأن تعجبه سوالف الحريم ويحس نفسه منهن صدف ان وحده تدوّر مقالب لزوجها يقالها تبي تجدد حياتها الزوجيه << والله زوجك اللي يحتاج انه يسوي تجديد وتجديد سريع بعد بحركه خطافيه مد خالد رجله يبي يقرّب الجوال منّه عشان يساعدها بالمقالب لأن هو حياته كلها مقلب اصلاً مسك جواله فتح القفل 12345 < وشوله حاط اجل ؟ القائمه – الرسائل – انشاء رساله : ( اللي تبين مقلب : إذا قرب وقت رجوعه البسي عباه كبيره عليك وتغطي زين عشان ما يكشفك و اجلسي في الدرج وإذا جاء يبغى يتعدى مدي يدك كنك شحادة بدون ماتتكلمين وبعد مايديك اللي فيه النصيب ولا يصرفك الحقيه في الدرج اللين ما يدخل مع الباب لا دخل أهجمي عليه وحاولي تدخلين وراه طبعا هو بينحاش ولا بيطردك كله على حسب شطارتك وأتقانك للدور هاهاها / شباصه ملونه )
جاري ارسال السماجه ! << هنّق
شاف رسالته ع الشاشه وقشعر جسمه ومات من الوناسه وحس ان سوبرمان شيء صدق وانه المهدي المنتظر وياشين الحماس الزايد
مره ثانيه : قعد يطقطق بجواله لين وصل انشاء رساله : ( اختي اللي تبغي مقلب عندي لكي حاجه حلوه لما اتخلصوا أكل و رحتي انت تغسلي ايديكي قبله بعد ما تخلصي افتحي الماء الحار و سكريها و شوفي لما هو حيجي يغسل بعدك ايش راح يصير هع هع / سوساااا ) ضغط ارسال وجاه : جاري ارسال الرساله وتراها آخر مره
مامداه يفرح برسالته الا ويطفي الكهرب ! شات التلفزيون برجله وطلع للشارع يبي يحارش المبزره مالقى أحد بالشارع بس لأن براسه حرش دخل البقاله ونصى الهندي : خالد : صديق انتا ليش في شغل بقاله ؟ الهندي : انا يبغى فلوس عشان ماما مسكين مريض خالد : وانا بعد ابغى فلوس ومالك دخل وشوله ابغاهن الهندي : ايش فيه صديق خالد : هالدرج يادرج افتحه وعطني من الخيرات اللي فيه الهندي : انتا فيه مشاكل كثير انا في كلّم شرطه يالله روووه خالد : جاي ديرتنا وتنفخ علينا ؟ وخّر قسم بالله اذبحك وماتعوق معي انخرع الهندي وخم الجدار ,قرّب خالد وآخذ كل حصيلة اليوم وعطى الهندي كف ومشى قبل لايطلع الا هذا جارهم صاحب البقاله جاي .. الهندي : بابا هدا نفر اخد كلو فلوس حق اليوم قبل لايكمّل الهندي جملته الا وغبار خالد يعجعج بالمكان ! طلع يركض ومانتبه للطريق الا هكالسياره اللي طاخته !
غيبوبة شهرين كانت كفيله بمسح ذاكرته تماماّ التمّه صحى خالد ومالقى حوله أحد زاعق لين جته السستر.. نص ساعه كانت كفايه لأهله بانهم يجتمعون كلهم عنده استوعبوا الجميع اللي صار الا خالد اللي قعد يدربي راسه بينهم ولايدري من وين هي هابّه ! جاء اخوه وقعد يعرّفه على أمه وعلى أبوه وعلى اخوانه رجعوه البيت بعد كم يوم ولكن خالد من طلع من المستشفى مانطق بكلمه جاء اخوه وطلّعه لمجلس الرجال على اساس ان فيه واحد يبي يقابله دخل المجلس الا هكالرجال اللي طالعتن الطنخه من عيونه خالد : السلام عليكم الرجال يفزّ من مكانه هلا هلا ماتشوف شر يابوي استرح استرح وشلونك ان شاء الله احسن .. خالد : ماعرفتك لاتكون انت زوجتي بعد ؟ الرجال : خخخخخخخخخخخ الا والله ابو زوجتك ان بغيت خالد : لحظه بسأل اهلي ان كانّي متزوج او لا .. لأن ان كنت متزوّج فـ أنا ابي بنتك تصير الثانيه وان كاني اعزب فـ ابيها الاولى الرجال : اسمع ياخالد انا مستعد لكل اوامرك وطلباتك انت اطلب ولايردك الا لسانك خالد : اول شيء من انت ؟ الرجال : تقدر تقول ان انا السبب باللي صار لك انا ادري اني غلطان وكنت مسرع ولاانتبهت لك ويمكن حياتك انتهت تقريباً لكن ان شاء الله انّا نبي نعوضك باللي تبي خالد : على حسب مافهمت انك انت اللي صدمتني ؟ الرجال : ومتحسف ونادم والله خالد : وانت وش دخلك تتحسف اذا انا نفسي مانيب متحسف ؟ الرجال : مايرتاح ضميري الا اذا طلبتني ونفذت لك خالد : ابي مليون وأبي وظيفه الرجال : جاك خالد : تزوجني الرجال : جاك خالد : ومزرعه وخيل وسياره الرجال : جاك خالد : يابن الحلال انا خالد مانيب جاك << منتيب بعيدتن عنّه الرجال : شهر واحنا مخلصين امورك خالد : ايه وخلك تسحب , عاد من قالك تصدّم خلق الله ؟ انضبط وقبل الشهر ابي طلباتي جاهزه ..
مرّ الشهر ! خالد مهو خالد اسلوبه تغيّر عقليته الغبيه ماتت صار شخص ثاني شخص مثقف يهتم بالقراءه يحب يكتب , ثقل الدم مرحلة ولّت صار خفيف ( دم طبعاً ) ! وفى الرجال بوعده زوّجه بنته اعطاه فلّه وسياره ومليون ووظيفه بأحدى شركاته زانت الأمور ضحكت الدنيا صار مهم وحس بالحياااه وكانت الفرحه غيير يوم جاته بنت وسمّاها نوره !
عند نفس الهندي بنفس البقاله وبنفس الشارع كان خالد طالع وهو (شاري هالمرّه ) لأهله اغراض فجأه سياره غير وصاحبها غير والضحيه واحد !
صحى خالد من الغيبوبه لقى الناس حوله هالمرّه : يووووه ياقدمكم اهله بكاء وفرح ودموووع ملت المكان خالد : عاد وشوله الصياح بعد ؟ ليتني ماصحيت واش اصحي له ياربي لك الحمد انور : حمد لله على السلامه يابونوره خالد : اسكت اسكت قال ابو نوره من وين تجي معه نوره وانا مابعد شفت امها ؟ انور : نوره بنتك يالمنتهي لاتقولي بعد انك ماتدري ! خالد : والله لاقيني بعد تقلّع انور : خالد : زينولي التلفزيون وحطولي على قناة بدايه !
ماااش فقير الحظ لايتعب بهالدنيا لأن الحظ شيء مهم بالحياه واللي ماله حظ وآعزي له الله من الشقا مهما صدفت مرّات ومهما فرح وقال زانت لابد تشين ولابد يتسكر بوجهه باب كان يظنه انفتح له والله يكبّر حظوظنا ولايشقينا ! ان زان حظك فأنت ابو نوره وان شان حظك فتراك خالد
الـــــســـــامـــــر Admin
عدد المساهمات : 155 تاريخ التسجيل : 27/04/2010
موضوع: رد: هذي الدنيا حظوظ الثلاثاء مايو 04, 2010 5:14 pm
مشكووووور على الموضوع تقبل شطفتي
خياالك دووم بعيووني Admin
عدد المساهمات : 127 تاريخ التسجيل : 28/04/2010
موضوع: رد: هذي الدنيا حظوظ الثلاثاء مايو 04, 2010 8:07 pm
موضوع: هذي الدنيا حظوظ 
الثلاثاء مايو 04, 2010 6:43 am
